قصة نانسي عجرم <<<تموت ضحك

السلام عليكم

حـكـايـتـي مع نـانـسـي عـجـرم في سـوق عـتـيـقـة.. دعـوة مـجـانـيـة للـضـحـك "
_______________________________________

الله مير انه يحيي (هـالخشش) الحلوة كلها .. يسعد لي صباح ومساء (هالكشرات) كلبوها
________________

<< مدخل حصري ل اتعبتني جروحي>>

قالوا تحبه ؟! قلت: بالحيل بالحيل * قالوا توده؟! قلت: ما اود غيره ..

قالوا تريده ؟! قلت: بالحيل بالحيل.. قالوا تعزه: قلت آه بالحيل بالحيل ..

قالوا تتمناه؟! قلت: يلعن جدفكم لكم ساعة طايحين فيني أسئلة!! توكلوا على الله عشان أبدأ القصة

_____________________________

( الفصل الأول )

- لحظات ماقبل ماقبل الحسم -

كان ياماكان .. ذات مساء عاصمي جميل .. وكنت في طريقي متجهاً الى وسط الرياض ..

بالتحديد ( سوق عتيقه ) حق الخضار والفواكه ..

وكان معي صديقي وحبيبي أبوفهيد _اللي أكيد عرفتوه عقب فزعته لي يوم أواجه الكلب المسعور

والعلاقة بيني وبين هذا الصديق تمتد لبطون التاريخ .. وذلك قبل 24 سنه أول ما انولدنا في اسبوع واحد ..

وكان يسولف لي عن مغامراته في سوق ( الغزل ) ومواعيده الغراميه مع ( بنات الهوى ) ..

وانا ( فاغرُُِِ ُ فاي ) ورايح وطي ورايح كشنه بالكشري مع سواليفه

-- تصدق يابوسارة ، أمس "دلول" أهدتني دب مكتوب عليه أحبك يا عذابي !!

-- تصدق يابوسارة ، هذا البوك اللي في يدي .. مهديته لي تغريد الربوع اللي طاف !!

-- تصدق بالله يابوسارة .. "هدى" سددت فاتورتي حقت الشهرين اللي راحوا وفيها ألفين ريال !!

وانا قاعد أستمع له و ( مبلم ) لدرجة اني قطعت اشارتين حمراوتين بس الله سلم !

0 0 0 0

ترن .. ترن .. دق جوال أبوفهيد .. ناظره وقال: يلعن أبو اللزقات ياهووووه ..

شف يابو سارة !! طالعت شاشة الجوال ومكتوب فيها: النشبه يتصل بك !!

قلت من هالنشبه ؟! قال: هذي ابتسام الله ياشيخ ياخذها .. أنواع الازعاج كل يوم عشرين مسج

وستطعش ستين اتصال .. سميتها نشبه ولا قمت أرد عليها .!!

قلت في نفسي : إيه بلا والله من العز اللي انت فيه .. يحق لك تطنش !! مو زيي منقطع

شاف ابو فهيد بقاله قال وقف وقف .. وش أجيب لك معي؟ قلت : أي شيء ..

نزل ابو فهيد البقالة وجواله عندي بالسيارة ..

قعدت أهوجس.. الحين أنا أزين من ابوفهيد بألف مرة .. وشعري أنعم منه وأرتب ..

وسيارتي أحلى من سيارته .. ومع هذا البنات عنده وانا ( متلحط ) بس بربع الاستراحه التماسيح!!

إيييييييييه الله يا أم كلثوم صدقتي يوم غنيتي من ألحان السنباطي وقلتي: الحظ لا منه استقعد.. وش يفكك منه ياوليدي

ورجاءاً لا أحد يسألني عن هالأغنيه لاني سألت السنباطي نفسه عنها ولا عرفها

ترن .. ترن .. قطع هواجيسي اتصال جوال ابوفهيد .. ناظرت الجوال وأثر النشبه يتصل بك!!

إنبرش علي ابليس انبراش مايسويه المنتشري وقال:

رد .. رد واسمع الصوت العسل .. انت في حياتك ماسمعت الا صوت حرمتين:

أمك لا قامت تدعي عليك.. وشغالتكم لا قالت: جيب شماغ انته .. انا فيه يكوي ..

شلت الجوال..ظغطت على السماعه الخضراء وقلت بصوت رومانسي حنوووون عاطفي حااد:

ألوووووووووووووه .. واحتريت الرد العسل والصوت الدافيء واذا بصوت أجش مكر مفر مقبل مدبر معا .. يخترق طبلتي:

-- وينك فيه يابن الحرام تاركني بالمستشفى ساعتين وتدوج في هالشوارع !!

من الروعه سكرت السماعه وذبيت الجوال وقلت الله ياخذك يالفقاش يابوفهيد.. أجل أبوك خليته ابتسام

ركب ابوفهيد ومعه بيبسي يشربه وعطاني براية خضراء !! قلت: خير ان شالله ؟

قال: انت مو تقول جب لي أي شيء ..

قلت: أقول ترى ابتسام تحتريك بالمستشفى يالنصاب !! ( دحجني ) بنظره حاقده وخذ جواله

وجلس ساكت وهو عيونه حمراء وبحر أمواج خدوده قاعده تتلاطم من قوة التهزيئه

وفجأة إذا بنا على أعتاب السوق الجميل سوق عتيقة المركزي
V
V
V

( الفصل الثاني )

<< لحظات ماقبل الحسم >>

دخلنا سوق عتيقه .. شريت كم حزمة خس على جرجير مع كراث وبطاطس على كوسه ..

وطماط وكرتون بردقان مصري وتفاح أحمر وعنب احمر عشان احس اني مودرن وولد نعمه

وطبعاً مانسيت الخيار لأني من النوع اللي يحب المكرووونه موت .. ولا تسألوني وش دخل المكرونه بالخيار لأني باختصار: أكره الحمبص

وهنا اشتدت وتيرة الاحداث ..

قاعد أحاسب راعي البسطه ..فـ مر من جنبي شبح !! هالشبح ياجماعة الخير ( لحس ) مخي!

خلاني بدون شعور أطلق تصفيره من شفايفي واقول: أويل حالي ويلاه .. يووووووه !!

دققت النظر .. وأثاريها بنت .. عليها عباية كتف مخصرة .. ياشيخ ألعن من خصر حرمة بابآي

والطرحه يلعب بها الهواء .. والنقاب ياقلبي على النقاب .. يذبحك ذبح الشاة بدون سكين ...

والعيون كل الكحل اللي بمحلات أبوريالين مكبوب فيها..والجوال (معلق) بالصدر بحركة سرياليه ..

هذا غير الزخارف اللي باالأكمام والدناديش اللي في جوانب العباة !!

طبعاً خلاف العطر اللي ريحته (شقت) خشمي وطلعت من بؤبؤي

أخوكم في الله ( بلم وفيوزاته ضربت ) وصرت زي ماقال الشاعر في كتاب النصوص :

مرحوم يا ضبٍ على الخط مدعوس ** له سبعة أيامٍ ومحدن درى به

قعدت أتمقل فيها .. أبحلق. أناظر.. متعجب!! وفجأة ..سددت لي نظره !!

و طاحت عينها بعيني.. ومن لهفة الموقف طاح أخوكم على بسطة الخضار حقت البياع ..

حسيت أثناء سقوطي بضحكة بانت في عيونها العذاب ..

شالني فهد والبياع وهم (يسموون)علي .... وقال لي ابوفهيد بخبث ابليسي ماكر:

أبو سارة.. الغزال يلزمك أو تتركه لحبيبك أبو فهيد؟

نقزت وقلت : أبوفهيد بلاش تكفى حكي أهل العصابات ترى تخوفني.. وش تقصد ؟

قال لا تستهبل معي.. البنت عينها عليك من يوم دخلت السوق..يعني ياتروح تظبط أمورك معها..

أو اتركها للي يفهمون هالشغلات .. وطق على صدره !!

نقزت ببراءة تثير الشفقة وقلت: لا لأ في ذمتك وفي صلاة امك وابوك .. الله يفضخ عيونك ان ناظرتها. . أنت عندك تغريد وهدى وغيرهم..

خل هذي لي أنا ( حالها ) قبلك .. ضحك وقال بمكر قروي!! : يهنيك فيها ياشيخ..لعيونك تركناها..

بيني وبينكم ترددت . لأني ماعمري عشت كذا موقف ,,. قعد يوسوس لي بليس عن يميني وابوفهيد عن يساري وهو يقول:

الحين تواجه كلب مسعور .. وتعجز تروض مهرة جت تتحرش فيك ..

حسيت انه استفزني بيني وبينكم والكلام للجميع .. رحت طاق صدري وقلت:

أنا ولد ابوي !! إرس ياترس واعتدل ياملف .. اليوم يومي وانا اخو شقحاء

طلعت قرطاسة علك ابونعناع غندور وكتبت الرقم وتحته اسم: لؤي

ولأول مرة في حياتي العمليه..قربت من البنت ورميت الرقم.. وجيتك أركض للسيارة وابوفهيد وراي ولا تسألوني عن الجرجير وكرتون البطاطس لأني نسيت اسمي وقتها

........................

مر يومين على القصه هذي .. ويأست من اتصال ( الغزال ) اللي ماطلع من بالي أبد ..

أيقنت أن البنت تركت الرقم بالأرض وطنشت ..

وفي تمام الثالثة فجراً .. ترن .. ترن .. (طبعاً نغمة موسيقيه بس مقدر أكتبها قلت : ترن ترن وافهموا )

رقم غريب كان واضح أنه رقم ( سوا ) .. قلت: ألو؟ جاني صوت حنون حنون خلى جوالي (يموع) في يدي ..

ألووووووه ... هاااااي .. الأخ لؤي ؟ ؟ قلت: لا .. إلا صح أنا لؤي نعم ؟

قالت: وش هالحركات ؟ قلت : أي حركات مافهمت ؟ ---> عمري يالبريء

قالت: الترقيم اللي بالسوق أو تسوي ناسي ؟ قلت : آها ذكرت بس والله آسف ..

قالت:وين اصرف آسف هذي فيه !! قلت بحنية مستفيدها من ابوفهيد الداشر:

والله آسف..ليت تعذريني..اختي عيونك وفتنتها الله يعلم خلتني أسوي شيء أول مرة اسويه بحياتي..

(( بيني وبينكم حسيت أن البنت تسلكت واستانست بالمدحه..رحت مزود العيار )) قلت :

حشا مو عيون هذيك.. هذيك أسلحة دمار شامل راح بوش يدورهم عند صدام وهم بعيونك !!

صدقيني أول ماشفتك قلت مستحيل تكون هذي انسانه مثلنا ..

هذي أكيد لوحة من لوحات بيكاسو طاحت منه وهو يتمشى في عتيقة !!

(( البنت داخت .. وبديت أحس ان صوتها قام يرعد .. واخوكم في فن التسليك استاد ))

قامت تضحك بدلع وقالت : الله اسلوبك حيل..حييل.. حيييل يجنن !! دمك بالمرة خفيف ..

رحت مزود العيار مرة وحده وقلت: فيه نصراوي مات ابوه قال كله من الحكم !!

ضحكت بصوت عالي:ههههههههههههااي الله يرجك يا لؤي ..

قلت: هاااه !! من لؤي ؟ قالت: ههههههههههههاا ههههه هذي بعد مرة حلوة..

من غيرك قاعدة أكلم .. الله يرجك لؤي!!

رحت مصرفها قلت : ايه استهبل معك (( بغيت اجيب العيد لأني أول مرة اسمع بلؤي ))

قلت: بليز ..بونسواغ ؟.؟ وش اسمك؟ ماتشرفت فيه ؟ ---> مسوي مثقف وهو أدلخ فرنسي

جاوبتني بدلع تبطي حليمة بولند تجي ربعه : إممممممم ماراح أقولك.. بس أول حرف (نوون ) ؟

قلت بدلاخه متأثرة بموسم التمور : نوون .. نووون .. نبوت سيف ؟!

قامت تضحك بقوة وتقول الله حسيبك يالؤي ماقد ضحكت هالضحك قبل اليوم وااااو وناسه انت ..

اوكي را ح اقولك .. معك ((نانسي)) يا لؤي .. اسمي ((نانسي)) ..

المهم راحت ساعه وربع غزل ودلع وتنكيت..قمنا نسولف سواليف لين أقام الفجر !! قالت وهي مستعجله:

لؤي عن اذنك الوالد قام يصلي واخاف يشوفني أكلم.. بعدين أحاكيك أوكي؟ باي حياتي !!

طــوط طــوط ..

يالربع هي قالت حياتي ولا ماقالت .. أخوكم في الله ( غاص ) في مرقده ..ثم قام..ثم انسدح..

خذت الجوال..دقيت على بوفهيد: سألته: الواحد لا كلم بنت..وحس برعشة ووده يحضن دولابه .. وش اسم هالحاله ؟

قال بخبث ومسوي فاهم: ههههههه.. ههههههه .. صرت زميل مهنة يابوسارة..والله وحبيت!!

قمت مبسوط وصاير مهلبية بالبشمل .. تركت بوفهيد على الخط ماقلت مع السلامه!!

رحت المراية.. (سرحت ) قذلتي اللي متطاق بسببها أنا وأبوي لي شهرين ..
قمت أبخبخ على روحي من كل عطر اشوفه قدامي..

حسيت نفسي انسان ثاني.. انسان غريب .. رومانسي .. صرت اسبح يومياً.. مو زي أول أسبح بس بالأعياد

المهم ..استمرت المكالمات بيني وبين نانسي.. تدق دقة وحده وتفصل ثم أرجع أكلمها ..

صح ان الفاتورة ( تمحطني ) بس كله لعيون الغلا يهون

صرت شخص ثاني..رومانسي عاطفي..صرت ما أتحمل اشوف الدجاجة تنذبح قدامي مع اني أول اذبح الخرفان بالعيد

اصحى من النوم أغني مع بشير : كتمت الحب وأثر الحب ماينفع له الكتمان

أمشي وأدندن مع وحيد الجزيره بن سعيد : ياناس حبيت واحد والمحبه صعيبه

في السيارة مع طلال دايركت : سيدي قوم ماخبرت اللي يحب يهتني بنووم سيدي قووم ..

ولا يهون سلامة وعيسى وعاصي الحلاني وأديموس .. وش دخل الأخير ما أدري

صرت من الناس اللي يؤمنون بالحب من أول آلو ..

صار ابوفهيد يحسدني وانا اللي كنت أحسده .. مسج يروح مسج يجي واستمرينا مده على هالحال
v
v
v
v

( الفصل الثالث )

<< لحظات الحسم >>

تعمقت العلاقة الهاتفيه بين لؤي - اللي هو أنا - وبين نانسي ..

لدرجة اني رحت التسجيلات .. شريت شريط نانسي عجرم .. رميت الشريط على طول ..وخذت الصورة

حطيتها بغرفتي .. وصار المدعو ابليس لما أكلم نانسي على التلفون يشبك الصوت بصورة نانسي عجرم ..

تعرفون ابليس حركات وبارع في هالأمور..

صار بيننا عيش وملح وحب وغزل..والبنت عليها أسلوب مو سهل ..يعني بالعربي الفضيخ:تعطيك
مثلاُ:

كنت مرة أكلمها عن واحد من العيال صار له حادث وتبرعت له أنا بدم ..

وسألتها: نانسي على طاري الدم وش فصيلة دمك انتي ؟

قالت: فصيلة دمي.. لؤي موجب!!.. قلت: هاه.. يعني وشو

قالت: دمي غلاي ظماي كله لؤي..انت دمي انت كلي ياحبيبي !!

واخوكم لاتسألون عنه وقتها.. ( انفرش ) في سريره وجته سكتة عاطفيه..

ماصحيت الا على وقع سطل موية بوجهي من الوالد وهو يقول: قم صل وانت فيذا كنك ثور ماعليه قلادة!!

والثيران في قاموس الوالد نوعين: واحد حبوب وهادي قدروا يلبسونه قلادة.. بس يظل ثور

والثاني: من زود هباله وثوارته ومطامره ماقدروا يمسكونه ويلبسونه قلادة.. وانا أتبع هالمدرسه

في نظر سماحة الوالد .. المهم خلونا الحين من سيرة الشايب..ونرجع لموضوع الحبايب

0 0 0 0

مرة من المراريت وأنا منسدح على جنب وأكلم الغلا نانسي .. قلت:

نانسي.. أبي أشوفك .. أبي أشبع عيوني بشوفتك لأني ما رويت من شوفة ذاك اليوم ..

قالت: أخاف مايعجبك شكلي .. وتقطع العلاقه ..

قلت: لأ وانا ولد أبوي .. أنا شفت عيونك ومستحيل ذيك العيون تكون على شينه ..

وبالأخير لو كنتي شينه صدقيني أنتي توأم الروح ..لو فارقتك روحي تروح ..

انتي سكنتي قلبي من الوريد الأيمن الى البطين الأيسر ولا يهوون الشريان الأورطي

نانسي .. ارحمي عاشقِِ ِ على وشك الموت .. نانسي الشوق ظالم .. لاتفجعين أمي في ولدها..

قالت: والله عليك أسلوب وكلام مدري من وين تجيبه يخلي الوحده تذوب غصب ..

قلت : هالكلام جبته من مشاعري.. نانسي قلبي اللي نطق مو لساني

قالت: بس.. بس .. كسرت قلبي والله حتى انا نفسي أشوفك ثانيه ..ولهت موت عليك ..

قلت خلاص الوعد متى ووين ؟

قالت: اممممم بكرة المغرب بنفس المكان عتيقة ..

قلت أووكي .. باي عشان أبدأ أتجهز للموعد اللي سيكون خالداً في براثن التاريخ البشري ..

_________

من بكرة ..رحت مظبط الشعر .. طاق الجنز .. مسوي سكسوكة لأن نانسي تقول أحب الرجال بسكسوكة

رحت لأخوي الكبير اللي توه مطلع من الوكالة كابرس رويال2004 طلبته منه وقال خذه ..

( واخوي الكبير على فكرة أخلاق حبووب وسمح ولسانه طاهر ومايسب أبد..

الا اذا كان ذاك اليوم سكران في الملحق فهو يلعن )

وصرت كل من شفته علمته اني بموعد غزلنجي .. وعلى بالي راعي غزل ووخر عن دربي ..

أتى المغرب الموعود .. ودخلت عتيقة ..

وقفت بالمكان اللي أتفقنا عليه .. دقيت وجت نانسي تمشي وركبت

طبعاً لا غنى عن نصائح ابوفهيد رحت موقف في حواري عتيقة الظلماء الضيقه ( أحم احم )

قلت :نانسي شيلي الطرحه .. سمعت ضحكتها بقمة الحياء .. دخت بس مسكت نفسي ..

شالت الطرحه قالت: شووووف !! قلت: من جد نانسي شيلي الطرحه ماحد فيه ..

قالت : لا تستهبل لؤي أنا شايلة الطرحه شوووف زين

ناظرت.. طالعت ..تمقلت ماشفت شيء .. يوم ابتسمت لي وشفت (ضروسها) دريت انها شايلة الطرحه صدق

معقولة نانسي كذا !! معقولة هذي اللي قصدت فيها عشر قصايد !!

معقولة هذي نسنس اللي دفعت 5 آلاف فواتير فدوة لها !!

مابينها وبين الكفر حق السيارة فرق اللهم ان الكفر فيه صواميل

قلت: حبيبتي نانسي.. ترانا (غرزنا) ممكن تدفين الموتر ؟!!

قالت: غرزنا في زفلت .. قلت بعصبيه وانا حاقد عشان فلوسي اللي طارت :

إيه غرزنا .. قومي دفي عشان اطلع السيارة ونروح لا احد يشوفنا ويشتبه فينا ..

هي نزلت ولا ما نزلت .. رحت دايس البنزين وناصي ابوفهيد ولعنت خامس جدفه

قال: وش دخلني .؟ قلت: الله يلعن الغزل والمغازل وخرابيطك كلها ..

قال عادي تصير في احسن العايلات .. اليوم كفر بكرة تلقى قمر ..

قلت خل الكفر والقمر لك وتووووووووووووووبه ..

.................................................. .......................

حكمة العدد :
اذا رأيت في السوق امرأة وأعجبتك .. فأذكر لؤي واهرب

.................................................. ..........

(الفصل الأخير )

وهو أهم فصل ..

قبل لايجيني واحد منكم مدرعم ومطفي النور ومشغل السكن ويشربك بالبوري ويمشي 180 ..

ويطب فيني ويقول: يافاسق..تجاهر بمعصيتك .. ومن هالكلام ..

أحب أقوله: هد السرعه لاعدمتك .. لا تروح في الصبه ثم نبلش بك

وقبل لايخش واحد من مشرفينا الغالين وينتف موضوعي

يالربع انا أوردت هالقصه الخرافيه اللي أختلقتها من بالي عشان شيئين:

1 - للشباب :
ترى الثقل زين .. مو كل ما شفتوا عباية مخصرة وعيون مكحلة درعمتوا ورااها

ترى المثل يقول : ياما تحت السواهي دواهي,,وياما تحت البراقع فواقع

ولا تصدقون ان الغزل فيه سعاده .. ترى مافيه الا الشقاء ..

قريت قبل كم يوم عن شاب متعلق ثلاثة أشهر بـ بنت في شات كتابي ..

ثلاثة شهور وهو يحب وفي الأخير صارت البنت رجال متنكر

يعني ركوووووود .. ركوود ترى الزعيم موجود

2- لأخواتنا البنات ..

ترى عباية الراس رووعه .. قمة الحشمه والاحترام .. تحفظين بها نفسك وغيرك ..

عباية الكتف واللثمه والخرابيط اللي من تالي مو عبايات ..

لأن ما عمر الزينه .. غطت زينة ..

فاصلة أخيرة:

أكيد انها قصة خرافيه لأني لما أرقم بأرقم (نقوة) مو طقاقة --->أمحق ناصح..جبت العيد ألف
مبروك

تحياتـ,,,

Tofy

هههههههههههههههههههههههه والله موتني من الضحك تسلم اخي عالموضوع

هههههههههههههههههههههه عنجد بتضحك شكرااا

» كلمات لا تموت
» نكت تموت من الضحكـ